«Բարձրավոլտ էլեկտրացանցեր» ՓԲԸ-ում տեղի ունեցավ Վերականգնման վարկերի բանկի (KfW) աջակցությամբ իրականացվող «Կովկասյան էլեկտրահաղորդման ցանց» (Հայաստան-Վրաստան հաղորդիչ գիծ/ենթակայաններ) ծրագրով նախատեսված Լոտ 1-ի՝ «Դդմաշեն» ենթակայանի կառուցման գլխավոր կապալառուի ընտրության գնումներն իրականացնող մրցութային հանձնաժողովի առաջին հրապարակային նիստը։
Մրցութային հանձնաժողովի նախագահ, «Բարձրավոլտ էլեկտրացանցեր» ՓԲԸ գլխավոր տնօրեն Դավիթ Միրզոյանը տեղեկացրեց, որ Լոտ 1-ի գլխավոր կապալառուի ընտրության մրցույթին մասնակցելու համար մինչև սահմանված վերջնաժամկետը հայտ են ներկայացրել երկու ընկերություն՝ «Անդրիթս» ընկերությունը (Andritz GmbH) և «Չայնա Նեշնլ Էլեքթրիք Ինջենիիրինգ» ընկերությունը (China National Electric Engineering Co.,Ltd.)։
Հետևելով Մրցութային փաստաթղթերի «Ցուցումներ հայտատուներին» բաժնի ընթացակարգին՝ նիստի ընթացքում բացվեցին միայն մրցույթին մասնակից հայտատուների կողմից ներկայացված տեխնիկական հայտերը: «Ֆիխթներ» խորհրդատվական ընկերության ներկայացուցիչը՝ հայտատու ընկերությունների ներկայացուցիչների աջակցությամբ, այբբենական կարգով բացեցին և ստուգեցին փաստաթղթերի ամբողջականությունը: Իսկ չբացված ֆինանսական առաջարկները հանձնվեցին մրցութային հանձնաժողովի նախագահին՝ ի պահ։ Հանձնաժողովի նախագահ Դավիթ Միրզոյանը նշեց, որ դրանք կբացվեն միայն տեխնիկական հայտերի գնահատման հաշվետվության հաստատումից հետո, իսկ հաղթած հայտատուի հետ գլխավոր կապալառուի լիավարտ հիմունքներով պայմանագրի կնքումը հնարավոր կլինի տեխնիկական և ֆինանսական հայտերի մանրամասն ուսումնասիրելուց, համապատասխան հաշվետվությունները սահմանված կարգով հաստատելուց հետո:
Հայտատուների կողմից ներկայացված տեխնիկական առաջարկները դիտարկելու և դրանց արդյունքները հանձնաժողովին ներկայացնելու նպատակով որոշվեց «Բարձրավոլտ էլեկտրացանցեր» ՓԲԸ գլխավոր տնօրենի հրամանով ստեղծել աշխատանքային խումբ։
Մրցութային հանձնաժողովի հրապարակային նիստին առցանց եղանակով հետևում էին նաև «Ֆիխթներ» խորհրդատվական ընկերության և հայտատուների այլ ներկայացուցիչներ։
