«Բարձրավոլտ էլեկտրացանցեր» ՓԲԸ նորանշանակ գլխավոր տնօրեն Արթուր Բաղդասարյանը հոկտեմբերի 26-ին հանդիպել է Գերմանիայի Զարգացման Բանկի /KFW/ էներգետիկայի և բնական պաշարների Արևելյան Եվրոպայի, Կովկասի, Կենտրոնական Ասիայի տարածաշրջանների ծրագրի ղեկավար Սանդրա Լուտցի հետ: Ծանոթության նպատակով կազմակերպված հանդիպման ընթացքում խոսվել է այն մասին, որ «Կովկասյան էլեկտրահաղորդման ցանց» (Հայաստան-Վրաստան հաղորդիչգիծ/ենթակայաններ) ծրագիրը ռազմավարական նշանակություն ունի Հայաստանի էներգահամակարգի համար, քանի որ Այրումում տեղակայված 500/400/220կՎ բարձր լարման հաստատուն հոսանքի փոխակերպիչ կայանի միջոցով հնարավոր կլինի միմյանց կապել Հայաստանի և Վրաստանի, Իրանի և Ռուսաստանի էներգետիկ համակարգերը, ամրապնդել տարածաշրջանային էներգահամակարգերի անվտանգությունը, ինչպես նաև ապահովել զուգահեռ աշխատանքի հնարավորությունները: Դրանից բացի հայկական և վրացական էլեկտրաէներգետիկ ցանցերը միացնելով միմյանց՝ հնարավոր կլինի Հարավային Կովկասի տարածաշրջանն ապահովել էլեկտրաէներգիայի հուսալի, ճկուն և փոխշահավետ միջսահմանային փոխանակման կարողություններով:
ԲԷՑ ՓԲԸ գլխավոր տնօրեն Արթուր Բաղդասարյանը վստահություն է հայտնել, որ համագործակցությունը KFW բանկի հետ կլինի բավական արդյունավետ ու ծրագիրը կիրականացվի բարձր մակարդակով:
Սանդրա Լուտցը շնորհավորել է Արթուր Բաղդասարյանին նոր պաշտոնում նշանակվելու կապակցությամբ: Նա նշել է, որ «KFW բանկ-Բարձրավոլտ էլեկտրացանցեր» համագործակցությունը արդեն տասնամյակի պատմություն ունի և պատրաստակամություն է հայտնել շարունակել համատեղ աշխատանքը՝ «Կովկասյան էլեկտրահաղորդման ցանց» բավական բարդ ու հետաքրքիր ծրագրի շրջանակներում:
