ԲԷՑ ՓԲԸ ղեկավարությունը, ի դեմս գլխավոր տնօրենի պաշտոնակատար Դավիթ Միրզոյանի, ՀՀ տարածքային կառավարման և ենթակառուցվածքների նախարար Գնել Սանոսյանի գլխավորությամբ հերթական աշխատանքային շրջայցն է կատարել ընկերության 400/220/20 կՎ «Նորավան», 220/110/ կՎ «Ագարակ-2» և 220/110/35/10/6/ կՎ «Շինուհայր» ենթակայաններ, ծանոթացել է ենթակայանների վերակառուցման աշխատանքների ընթացքին։
Շրջայցին ներկա են գտնվել Հայաստանում ԻԻՀ դեսպան Մեհդի Սոբհանին, Սյունիքի մարզպետ Ռոբերտ Ղուկասյանը և պաշտոնատար այլ անձինք, որոնց ներկայացվել է «Նորավան» ենթակայանում կատարված աշխատանքների ընթացքը: Դավիթ Միրզոյանն ընդգծել է, որ մինչև տարեվերջ նախատեսվում է ավարտին հասցնել մալուխների անցկացման աշխատանքները, կատարել բարեկարգման աշխատանքներ, իսկ 2025 թվականի ընթացքում իրականացնել ենթակայանի տեխնիկական վերազինման աշխատանքները։ Հատկապես նշվել է «Նորավան» ենթակայանի կառավարման շենքի նորոգման մասին, որտեղ տեղադրված արդիական սարքավորումները հնարավոր են դարձնում իրականացնել մոնիթորնիգ և Երևանում և Թեհրանում։
Այցի ընթացքում դիտարկվել են նաև Հայաստանից՝ Իրան հենարանների տեղադրման հատվածները։ Վերջին երկու ամսվա ընթացքում տեղադրվել է մոտ 40 հենասյուն, կատարվել են բետոնացման աշխատանքները, որոնք իրականացվում են բարդ ռելիեֆային պայմաններում։ Ձեռք է բերվել պայմանավորվածություն ամրապնդել համագործակցությունը իրանական կողմի հետ՝ աշխատանքներն էլ ավելի օպերատիվ կազմակերպելու և իրականացնելու ուղղությամբ:
ՀՀ ՏԿԵ նախարար Գնել Սանոսյանը հաջորդ կանգառը կատարել է 220/110/6կՎ «Ագարակ-2» ենթակայանում: Այստեղ ևս նախարարը մանրամասն ծանոթացել է ենթակայանի վերակառուցման աշխատանքներին։ Դավիթ Միրզոյանը շեշտեց, որ «Ագարակ-2» ենթակայանը կարևոր նշանակություն ունի էլեկտրաէներգիայի ճկունության և հուսալիության բարձրացման համար, քանի որ «Շինուհայր» ենթակայանից «Մեղրի-1» և «Մեղրի-2» էլեկտրահաղորդման գծերը միանում են «Ագարակ» ենթակայանին, որտեղից «Արասբարան-1» և «Արասբարան-2» էլեկտրահաղորդման գծերով էլեկտրաէներգիան մատակարարվում է Իրան։ 1 ժամում ենթակայանը կարող է մինչև 300 մեգավատ էլեկտրաէներգիա արտահանել Իրան։ «Նորավան» ենթակայանի շահագործումից հետո հնարավոր կլինի այն ավելացնել ևս 200 մեգավատ հզորությամբ և ժամում 500 մեգավատ հզորությամբ էլեկտրաէներգիա արտահանել Իրան, իսկ Հայաստան-Իրան 3-րդ էլեկտրահաղորդման գծի կառուցման և «Հրազդան» հանգույցի «Դդմաշեն» կայանի շահագործման պարագայում՝ արտահանման հնարավորությունը կավելանա ժամում հավելյալ 500 մեգավատով, ընդհանուր հանրագումարը կազմելով 1000 մեգավատ:
Սյունիքի մարզ կատարած շրջայցն ավարտվել է 220/110/35/10/6/կՎ «Շինուհայր» ենթակայանում: Գնել Սանոսյանը դիտարկել է ենթակայանում կատարված աշխատանքները։
Շինուհայր ենթակայանը կառուցվել և շահագործման է հանձնվել 1961 թվականին: Շահագործումից հետո այնտեղ կատարվել են մասնակի վերակառուցման աշխատանքներ: Ենթակայանի հիմնանորոգման աշխատանքների մեկնարկը տրվել է 2018-2019թթ.: Ներկայումս աշխատանքները գտնվում են ավարտական փուլում:
Ենթակայանի դրվածքային հզորությունը 251 մեգավատ է։ Տեղադրված են մեկ 125 և երկու 63 մեգավատ հզորության նոր ավտոտրանսֆորմատորներ:Այն համակարգային նշանակության հանգուցային ենթակայան է և միակն է, որտեղ կան բոլոր 220, 110, 35, 10 և 6 լարումները։
