«Բարձրավոլտ էլեկտրացանցեր» փակ բաժնետիրական ընկերության աշխատանքային խումբը՝ գլխավոր տնօրենի պարտականությունները կատարող Դավիթ Միրզոյանի գլխավորությամբ, ս/թ հոկտեմբերի 13-15-ը այցելել է «Արարատ-2», «Նորավան», «Շինուհայր» և «Ագարակ-2» ենթակայաններ։
Աշխատանքային այցի նպատակն էր՝ տեղում ծանոթանալ ենթակայաններում իրականացվող վերակառուցման ծրագրերի ընթացքին, կատարված աշխատանքներին, քննարկել վերակառուցման ընթացքում առաջացած խնդիրները, ինչպես նաև առաջիկա անելիքները։
220/110/6 կՎ «Արարատ-2» ենթակայանի վերակառուցման շրջանակներում նախատեսված է իրականացնել 220, 110 կՎ ԲԲՍ-ների վերակառուցում և մասնակի փոխարինում, 6 կՎ ՓԲՍ շենքի վերակառուցում, բջիջների փոխարինում, երկուական ավտոտրանսֆորմատորների և գծային կարգավորիչ տրանսֆորմատորների փոխարինում, ԵԿԿ և պահեստի շենքերի վերակառուցում, ՌՊԱ սարքավորումների և SCADA համակարգի արդիականացում և թվայնացում, ինչպես նաև տարածքի բարեկարգում, պարիսպի վերակառուցում, տեսահսկման համակարգերի տեղադրում։
«Իրան-Հայաստան 400 կՎ էլեկտրահաղորդման օդային գծի և համապատասխան ենթակայանի (400/220/20 կՎ «Նորավան») կառուցում» ծրագրի շրջանակներում 400/220/20 կՎ «Նորավան» ենթակայանում ավարտվել են բարձր լարման սարքավորումների հիմքերի բետոնացման և դրանց մոնտաժման աշխատանքները, հիմնականում ներկրվել են ցածր լարման սարքավորումները և ռելեական պաշտպանության ավտոմատիկայի սարքավորումները։ Ընթացքում են ենթակայանի շենք-շինությունների շինարարական աշխատանքները։
«Ագարակ-2» ենթակայանի վերակառուցման ծրագրի շրջանակներում արդեն վերակառուցվել է 220 կՎ ԲԲՍ-ն, կառուցվել են 110 կՎ ԲԲՍ-ն և 6 կՎ ՓԲՍ-ները, մոնտաժվել, կարգաբերվել և լարման տակ են դրվել 110 կՎ և 6 կՎ սարքավորումները։ Կարգաբերվել, փորձարկվել և լարման տակ են դրվել նաև 125 ՄՎԱ հզորության ավտոտրանսֆորմատորը և 6/6 կՎ գծային կարգավորիչ տրանսֆորմատորը։ Ծրագրի շրջանակներում կարգաբերվել և թողարկվել են ՌՊԱ սարքավորումները։
Ընթացքի մեջ են ենթակայանի կառավարման շենքի, 220 կՎ և 110 կՎ լարման ԲԲՍ-ների տարածքների բարեկարգման աշխատանքները։
220/110/35/10/6 կՎ «Շինուհայր» ենթակայանի վերակառուցման ծրագրի առաջին և երկրորդ փուլով նախատեսված էլեկտրամոնտաժային և շինարարական աշխատանքներն ավարտվել են և սկսվել են երրորդ փուլով նախատեսված աշխատանքները /ԱՏ-2 և Տ-1-ի նորոգում, 220 կՎ և 110 կՎ ԲԲՍ-ների տարածքի բարեկարգում, շենք-շինությունների վերակառուցում, ներքին և արտաքին պարիսպների կառուցում, նորոգում և այլն/։ Իրականացվել է սարքավորումների փորձարկումը և կարգաբերումը։ Ավտոտրանսֆորմատոր N 3-ը և N 1-ը, տրանսֆորմատոր N 2-ը և համապատասխան սարքավորումները փորձարկվել և դրվել են լարման տակ։ Գործարկվել են նաև ռելեական պաշտպանության և ավտոմատիկայի սարքավորումները։
Յուրաքանչյուր ենթակայանում մանրամասն քննարկվել են բարձրացված հարցերը:
