Նորություններ

Ապրիլի 12-14-ը Երևանում էր իրանական «Սանիր» ընկերության աշխատանքային խումբը՝ տնօրեն Մանսուր Սայեդիի գլխավորությամբ։ «Սանիր» ընկերությունը «Իրան-Հայաստան 400 կՎ էլեկտրահաղորդման օդային գծի և Նորավան ենթակայանի» կառուցման ծրագրի կապալառուն է։

«Բարձրավոլտ էլեկտրացանցեր» ընկերությունում տեղի ունեցած խորհրդակցությունների ընթացքում քննարկվել են են «Իրան-Հայաստան 400 կՎ էլեկտրահաղորդման օդային գծի և Նորավան ենթակայանի» շինարարության ընթացքն ու առաջիկա անելիքները:

«Բարձրավոլտ էլեկտրացանցեր» ընկերության գլխավոր տնօրեն Կարեն Հովհաննիսյանը՝ կարևորելով ծրագրի դերն ու նշանակությունը Իրանի և Հայաստանի էներգահամակարգերի զուգահեռ աշխատանքի հուսալիության ապահովման գործում, նշել է, որ էլեկտրահաղորդման օդային գծի և «Նորավան» ենթակայանի կառուցման աշխատանքները պետք է իրականացվեն բարձր որակով և սահմանված ժամկետում։ Նա նշել է նաև, որ ծրագրի իրականացման ընթացքում գլխավոր կապալառուին կցուցաբերվի հնարավոր աջակցություն՝ շինարարությունը պատշաճ կերպով ավարտին հասցնելու համար։

«ՍԱՆԻՐ» ընկերության տնօրեն Մանսուր Սայեդին իր հերթին շնորհակալություն է հայտնել հայ գործընկերներին ծրագրի իրականացման հետ կապված հարցերին հրատապ արձագանքելու և լուծումներ տալու պատրասակամության համար: Նրա խոսքով արվելու է հնարավոր ամեն ինչ, որ Իրան-Հայաստան բարձրավոլտ 3-րդ գծի ու ենթակայանի շինարարությունը իրականացվի սահմանված ժամկետում։

Հայ-իրանական աշխատանքային խումբն այցելել է նաև «Նորավան» ենթակայանի շինհրապարակ ու տեղում ծանոթացել կատարվող աշխատանքների ընթացքին։ Արձանագրվել է, որ նկատելի առաջընթաց կա շինարարական և էլեկտրոմոնտաժային աշխատանքներում։

«Իրան-Հայաստան 400 կՎ էլեկտրահաղորդման օդային գծի և Նորավան ենթակայանի» շինարարությունը նախատեսված է ավարտել 2023 թվականի տարեվերջին։