Մարտի 11-ին և 13-ին «Բարձրավոլտ էլեկտրացանցեր» ընկերությունում տեղի են ունեցել քննարկումներ՝ «Կովկասյան էլեկտրահաղորդման ցանց I-III» (Հայաստան-Վրաստան հաղորդիչ գիծ/ենթակայաններ) ծրագրի ընթացքի և ծրագրի շրջանակներում իրականացվելիք հետագա գործողությունների վերաբերյալ։ Հանդիպմանը մասնակցել են «Բարձրավոլտ էլեկտրացանցեր» ընկերության աշխատանքային խումբը՝ գլխավոր տնօրեն Դավիթ Միրզոյանի գլխավորությամբ, ինչպես նաև Վերականգնման վարկերի (KfW) բանկի և Եվրոպական ներդրումային բանկի (ԵՆԲ) ներկայացուցիչները։
«Բարձրավոլտ էլեկտրացանցեր» ընկերության գլխավոր տնօրեն Դավիթ Միրզոյանը ողջունել է գործընկերներին ու նշել, որ «Կովկասյան էլեկտրահաղորդման ցանց» ծրագիրը ռազմավարական նշանակություն ունի Հայաստանի էլեկտրաէներգետիկական համակարգի համար։ Նրա խոսքով ծրագիրը կապահովի էլեկտրաէներգիայի հուսալի, ճկուն և փոխշահավետ միջսահմանային փոխանակում ոչ միայն Հայաստանի և Վրաստանի միջև, այլև Հարավային Կովկասի տարածաշրջանում ու դրանից դուրս։
Ընկերության գլխավոր տնօրենը փաստել է, որ ընկերությունը ձեռնարկում է բոլոր հնարավոր միջոցները, ծրագրի խորհրդատու «Ֆիխթներ» ընկերության, KfW Բանկի և ԵՆԲ-ի ներկայացուցիչների հետ ծրագրի խնդիրները քննարկելու և ծրագիրն իրականացնելու համար, միաժամանակ առաջարկել համատեղ ջանքերով աշխատել՝ առավելագույն արդյունքների հասնելու համար:
KfW բանկի և ԵՆԲ-ի ներկայացուցիչներն իրենց հերթին պատրաստակամություն են հայտնել շարունակել համատեղ աշխատանքը՝ «Կովկասյան էլեկտրահաղորդման ցանց» բարդ ու հետաքրքիր ծրագրի շրջանակներում:
