Օգոստոսի 11-ին «Բարձրավոլտ էլեկտրացանցեր» փակ բաժնետիրական ընկերության և Իրանի Իսլամական Հանրապետության Gam Arak Industrial ընկերության միջև ստորագրվել է Համաշխարհային Բանկի կողմից ֆինանսավորվող «Էլեկտրամատակարարման Հուսալիություն» ծրագրի շրջանակներում իրականացվող «Լալվար-Նոյեմբերյան» 110կՎ էլեկտրահաղորդման օդային գծերի փոխարինման համար պայմանագիրը: Պայմանագիրը ստորագրել են «Բարձրավոլտ էլեկտրացանցեր» փակ բաժնետիրական ընկերության գլխավոր տնօրեն Արամ Անանյանը և Gam Arak Industrial ընկերության գործադիր տնօրեն Նասրոլահ Ռահնաման: Միջոցառմանը մասնակցել են Հայաստանում Իրանի Իսլամական Հանրապետության փոխդեսպան Շահբազ Սոլբին, դեսպանության Խորհրդական Աբաս Ղորբանին, դեսպանության առևտրի գծով կցորդ Հմայակ Ավետիսյանը և Էներգետիկայի և բնական պաշարների նախարարության ներդրումային ծրագրերի վարչության պետ Հայկ Հարությունյանը: Իրանական Gam Arak Industrial ընկերությունը, «Նոյեմբերյան» և «Լալվար» 110կՎ օդային էլեկտրահաղորդման գծերի փոխարինման գլխավոր կապալառուի ընտրության մրցույթը հաղթել է 4 394 456, 24 (չորս միլիոն երեք հարյուր իննսունչորս հազար չորս հարյուր հիսունվեց ամբողջ քսանչորս) ԱՄՆ դոլար արժեքով : 110 կՎ «Լալվար -Նոյեմբերյան» էլեկտրահաղորդման գծի վերակառուցման աշխատանքները նախատեսվում է սկսել 2016թ հուլիսին և ավարտել 2018թ.:
