Նորություններ

«Բարձրավոլտ էլեկտրացանցեր» ընկերության աշխատանքային խումբը՝ գլխավոր տնօրեն Կարեն Հովհաննիսյանի ղեկավարությամբ, հունիսի 2-ից 5-ը, աշխատանքային այցով գտնվում էր Իրանի Իսլամական Հանրապետությունում։

Թեհրան կատարած այցի ընթացքում «Բարձրավոլտ էլեկտրացանցեր» ընկերության և SUNIR International FZE ընկերության ներկայացուցիչները քննարկել են Իրան-Հայաստան 400կՎ էլեկտրահաղորդման օդային գծի և համապատասխան ենթակայանի կառուցման ծրագրի ընթացքը։

«Բարձրավոլտ էլեկտրացանցեր» ընկերության և SUNIR International FZE ընկերության միջև ստորագրվել են մի շարք համաձայնագրեր՝ ծրագրի ֆինանասավորման ժամկետները մինչև 2023թ․ դեկտեմբերի 31-ը երկարաձգելու վերաբերյալ։

Այցի շրջանակներում «Բարձրավոլտ էլեկտրացանցեր» ընկերության ներկայացուցիչները այցելել են նաև իրանական «Պարս Տաբլո» ընկերության գործարան, որը երկրորդային շղթաների սարքավորումներ է արտադրում «Նորավան» ենթակայանի համար։

Իրան-Հայաստան 400կՎ էլեկտրահաղորդման օդային գծի և համապատասխան ենթակայանի կառուցման ծրագիրը ռազմավարական նշանակություն ունի Հայաստանի Հանրապետության համար․ ծրագրի նպատակն է Հայաստանի և Իրանի միջև էլեկտրաէներգիայի փոխհոսքերը 350 ՄՎտ-ից հասցնել 1200 ՄՎտ-ի, բարձրացնել երկու երկրների էներգահամակարգերի զուգահեռ աշխատանքի հուսալիությունն ու կայունությունը, բարձրացնել Հայաստանի էներգահամակարգի անվտանգության մակարդակը՝ հանրապետության հյուսիս-հարավ էներգակապի հզորացմամբ, ինչպես նաև ամբողջ ծավալով օգտագործել Իրան-Հայաստան գազատարի թողունակությունը՝ «Գազ-էլեկտրաէներգիայի դիմաց» ծրագրի շրջանակներում։